Xornadas Novos retos novas metodoloxías

Xornadas Novos retos novas metodoloxías

Xornadas Novos retos novas metodoloxías 1754 2480 Facultade de Socioloxía - UDC

A Facultade de Socioloxía, en colaboración coa Vicerreitoría de Estudantes, Participación e Extensión Universitaria, celebrará o vindeiro xoves 17 de outubro a xornada “Novos retos, novas metodoloxías”. Cun formato de mesa redonda, a sesión constituirá un punto de encontro interdisciplinar desde o que pensar, coa socioloxía e a antropoloxía, os novos retos e desafíos da sociedade contemporánea.

Os cambios ambientais, tecnolóxicos, económicos ou políticos, así coma os cambios nos paradigmas de participación e representación, obrigan ás ciencias sociais a repensar os seus repertorios epistemolóxicos e metodolóxicos. Para poñer en común estas novas metodoloxías, contarase coa presenza de tres investigadores novos pero cunha contrastada experiencia internacional: Sara Lafuente Funes (Institut für Soziologie, Goethe-Universität Frankfurt am Main), coa súa ponencia “Investigar prácticas biomédicas, seguir a los óvulos en laboratorios, aulas y trayectorias”; Adolfo Estalella (Universidad Complutense de Madrid), quen presentará “La ciudad, la etnografía y el inventorio de modos de indagación”; e Tomás Sánchez-Criado (Humboldt-University of Berlin), quen falará de “Spiel-Raum: Jugársela montando espacios de vecindad crítica”. A sesión dará comezo ás 16:00h. no salón de graos da Facultade de Socioloxía.